काठमाडौँ । सूचना तथा सञ्चारमन्त्री मोहनबहादुर बस्नेतले चीनले गरेको विकासबाट नेपालले पाठ सिक्नुपर्नेमा जोड दिएका छन् ।
चीन दक्षिण एशिया मेला सचिवालय, नेपाल चीन कार्यकारिणी परिषद् र युनान इन्टरनेशनल एक्पोजिसन अफेयर्स ब्यूरोको आयोजनामा आजदेखि भृकुटीमण्डपमा शुरु भएको ‘चीन दक्षिण एशिया मेला’ उद्घाटन गर्दै उनले नेपालको उद्योग र व्यापारलाई प्रवर्धन गर्न मेलाले महत्वपूर्ण भूमिका निर्वाह गर्ने बताए ।
“नेपालको व्यापार घाटा बढिरहेका बेला यस्ता मेलाले नेपालको आर्थिक विकासका लागि ठूलो सहयोग पुग्दछ,” मन्त्री बस्नेतले भने ।
संविधान निर्माण पछि स्थानीय तहको निर्वाचन भइसकेको र अब संघ तथा प्रदेशको निर्वाचन गरेर मुलुकलाई आर्थिक विकासको बाटोमा अगाडि बढाउनु आवश्यक रहेको उल्लेख गर्दै उनले सुझाव दिए, “राजनीतिक अस्थिरताका कारण नेपालमा लगानी गर्ने वातावरण थिएन अब निर्वाचनसँगै राजनीतिक अस्थिरता समाप्त भएको छ, ढुक्क भएर लगानी गर्नुहोस्।”
नेपाल चीन कार्यकारिणी परिषद्का अध्यक्ष अनुपरञ्जन भट्टराईले नेपालका लगानीकर्ता र व्यापारीका लागि यो मेला सहयोगी हुने र आगामी दिन देशका विभिन्न भागमा यस्तो मेला गरिने बताए ।
चीन दक्षिण एशिया मेलाका कार्यकारी समितिका प्रमुख गाओ सुजुनले मेलाले दुई देशको व्यापार, सांस्कृतिक, आर्थिक तथा सामाजिक सम्बन्धलाई बलियो बनाउँछ भने।
नेपालमा पहिलोपटक हुन लागेको उक्त मेला आजदेखि आगामी कात्तिक १९ गतेसम्म चल्नेछ । नेपाल तथा चीनमा उत्पादित वस्तुका १५० कक्षमा ऊर्जा, लगानी, प्राकृतिक स्रोतको विकास, विद्युतीय तथा सूचना प्रविधि, चिया उत्पादन, पर्यटन प्रवर्धन, हस्तकलाका सामग्री, परम्परागत पोशाक, खानेकुरा प्रशोधन उपकरण लगायतका सामग्री राखिएका छन् ।
