स्वास्थ्य

यस कारण डा. गोबिन्द केसीले गरे अनशन स्थगीत

काठमाडौँ, ३१ साउन । चिकित्सा शिक्षा ऐन आउनुपर्ने प्रमुख मागसहित २३ दिनदेखि अनशनमा बसेका प्रा डा गोविन्द केसीले मंगलबार अनशन स्थगित गरेका छन् ।

त्रिवि शिक्षण अस्पतालमा साँझ ८ बजे पत्रकार सम्मेलन गर्दै उनले तराईमा गएको बाढी र पहिरोले जनधनको क्षति भइरहेका समयमा अनशन बस्दा ग्लानी भएको भन्दै स्थगित गरेको बताए ।

उनले भने, “चिकित्सा शिक्षा र जनमुखी स्वास्थ्य सेवाका लागि मेरो सत्याग्रह जारी छ, अहिले तराईमा आई परेको प्राकृतिक प्रकोपमा सबै सहयोगमा जुट्नुपर्ने भएकाले अनशनमा बस्न उचित नभएकाले तराईको स्थिति सामान्य नहुन्जेलसम्म आन्दोलनको स्वरूप परिवर्तन मात्र गरिएको हो ।”

देशलाई आइलागेको बिपत्तीमा धेरैले आफन्त गुमाएका छन्, धेरैको रोजीरोटी खोसिएका छन् भन्दै डा केसीले बाढीपछि आइलाग्ने महामारीजन्य प्रकोप व्यवस्थापन गर्ने चुनौती भएकाले यसप्रति सबै पक्षको ध्यान केन्द्रित हुनुपर्नेमा जोड दिए ।

सरकारले केही माग पूरा गरेपनि माथेमा प्रतिवेदन र अन्य सुझाव समेटेर सही रूपमा चिकित्सा शिक्षा ऐन पारित गर्नुपर्ने काम बाँकी रहेकाले लडाईं जारि रहने उनको भनाई छ ।

“जनमुखी र विद्यार्थीमुखी ऐन ल्याएरै छाड्छु, देशलाई माफियाको चंगुलबाट बचाउन म सधैं लागिरहनेछु, यस समयमा सहयोग गर्ने नागरिक समाज, सञ्चारमाध्यम र आमनागरिकलाई धन्यवाद दिन चाहन्छु,” डा. केसीले भने।

एघारौँ पटक अनशनमा बस्नुभएका डा केसीले यस पटक अनशन तोडेको नभई स्थगन मात्र भएकोले सदाझैँ जुस भने पिएनन् । डा केसीको स्वास्थ्य अवस्था नाजुक भएकाले उनलाई साँझ नै शिक्षण अस्पतालको सघन कक्षमा राखी उपचार सुरू गरिएको छ ।