पोखरा, २५ साउन । कास्कीको माछापुच्छ्रे गाउँपालिका–५ रिभान पाथ्रेका १३ बाढीपीडित परिवारलाई राहत वितरण गरिएको छ ।
कास्कीका प्रमुख जिल्ला अधिकारी तारानाथ अधिकारी आज घटनास्थलमै पुगी जिल्ला प्रशासन कार्यालयका तर्पmबाट हरेक बाढीपीडित परिवारलाई रु १५ हजार नगद, त्रिपाल र कम्बल वितरण गरेका हुन् ।
त्यस्तै, नेपाल रेडक्रस सोसाइटी कास्कीका सभापति वामदेव ढुंगानाले संस्थाको तर्पmबाट ५० केजी चामल, कम्बल, भाँडाकुँडा, लत्ताकपडा लगायतका सामान वितरण गरे ।
सो गाउँमा बाढीबाट अन्दाजी रु दुई करोड ८२ लाख ४५ हजारभन्दा बढीको धनमाल क्षति भएको घटनास्थलमा पुगेका प्रहरी सहायक निरीक्षक बिलबहादुर थापाले जानकारी दिए ।
यस्तै, बाढीले हुम्दी खहरे खोलाको मोटरेबल पुल र कल्भर्ट पुल, बिजुलीको खम्बा, ट्रान्सफर्मर बगाउँदा रु ७६ लाख बराबरको सरकारी क्षति भएको छ । बाढीले विद्युत्को ट्रान्सफर्मर र खम्बा बगाउँदा गएरातिदेखि नै गाउँ अन्धकार बनेको छ ।
बाढीले एक गाई, चार बाख्रा र ५२५ भन्दाबढी कुखुरा पनि बगाएको छ । माथिबाट पहिरो आउँदै छ भन्ने सूचना पाएपछि घरमा सुतेका सबै गाउँले भागेर सुरक्षित स्थानतर्फ लागेकाले मानवीय क्षति भने हुन पाएन ।
बाढीपीडित अहिले आफन्तको घरमा आश्रय लिएर बसिरहेका छन् । भीषण वर्षासँगै हुम्दी खहरे खोला गाउँमा पसेको थियो । बाढीले घरमा राखेको अन्नपात, लत्ताकपडा र खेतबारीमा लगाएको धानबाली सबै नष्ट भएकोे प्रहरी सहायक निरीक्षक थापाले बताए ।
