काठमाडौँ । नेपाली काँग्रेसका शीर्ष नेताहरुले आफ्ना नेता रामहरि जोशीको पार्थिव शरीरमा भावपूर्ण श्रद्धाञ्जलि अर्पण गरेका छन् ।
नेपाली राजनीतिमा गान्धीवादी एवं समाजवादी पुराना नेताको रुपमा चिनिनुभएका जोशीको दम र निमोनियाका कारण बिहीबार साँझ ९३ वर्षको उमेरमा ग्रान्डी अस्पतालमा निधन भएको थियो ।
अन्तिम श्रद्धाञ्जलिका लागि उहाँको पार्थिव शरीरलाई सानेपास्थित नेपाली काँग्रेसको पार्टी कार्यालयमा राखिएको थियो ।
पार्टीका सभापति एवं प्रधानमन्त्री शेरबहादुर देउवाले स्व जोशीको पार्थिव शरीरमा अन्तिम श्रद्धाञ्जलि दिएका छन् ।
यसैगरी नेकाका वरिष्ठ नेता रामचन्द्र पौडेल, नेता विमलेन्द्र निधि, कृष्णप्रसाद सिटौला, डा रामशरण महतलगायत नेता तथा कार्यकर्ताले आफ्ना पुराना नेताको पार्थिव शरीरमा भावपूर्ण श्रद्धाञ्जलि अर्पण गरे ।
विसं १९८३ मा सर्लाहीमा जन्मनुभएका नेता जोशी विसं २००७ देखि नै नेकाको राजनीतिमा सक्रिय थिए । नेकाका संस्थापक नेता कृष्णप्रसाद भट्टराईको निष्ठा र आदर्श जीवनपद्धतिको पदचापमा उहाँ अविछिन्न र अविचलितरुपमा लागिरहेका थिए।
आफ्नो जीवनका केही समय उनले सर्लाही, हरिऔन, सुकेपोखरीस्थित चतुर्भुजेश्वर जनता माविका प्रधानाध्यापक रही शिक्षा सेवासमेत गरेका थिए । राजनीतिमा सक्रिय भएपछि उनले विवाहसमेत गर्न भ्याएका थिएनन् । वरिष्ठ नेता पौडेलले भने – “जोशीले जीवनभर गरेको नीति, निष्ठा र आदर्शको राजनीतिलाई भावी पुस्ताले अविछिन्नरुपमा पछ्याउनुपर्छ ।”
जोशीले लेखेको ‘अँध्यारोबाट उज्यालोतिर’ भन्ने पुस्तक चर्चित रहेको छ ।
आजीवन पार्टी र प्रजातन्त्रका लागि लडी करिब नौ वर्ष कारागारमा पर्नुभएका उनी विसं २०४८ र २०५१ मा सर्लाही जिल्लाबाट सांसद बनेका थिए । साथै विसं २०४८ मा गिरिजाप्रसाद कोइरालाको नेतृत्वको सरकारमा पर्यटन तथा नागरिक उड्डयनमन्त्री समेत बनेका थिए ।
घरको शौचालयमा लडेर चोट लागेपछि उनलाई यही असार २१ गते अस्पताल भर्ना गरिएको थियो । सर्लाही स्थायी घर भएका उनी ललितपुरको नख्खीपोटमा आफन्तका घरमा बस्दै आएक थिए ।
स्व जोशीको आजै पशुपति आर्यघाटमा अन्तिम दाहसंस्कार गरिएको छ।
