पु.समाचार

प्रधानमन्त्री लगायत शीर्ष नेताहरुको आयो यस्तो प्रतिक्रिया

काठमाडौं । राप्रपाको राष्ट्रिय महाधिवेशनको अवसरमा प्रधानमन्त्री लगायत प्रमुख दलका नेताहरुले आ आफ्नो धारणा राखेका छन् । राप्रपालाई नयाँ शक्तिको रुपमा स्थापित हुन आग्रह गर्दै उनीहरुले यस्तो प्रतिक्रिया दिएका हुन् । यस्तो छ उनीहरुले राखेका धारणा–
संविधान कार्यान्वयनमा राप्रपाको सहयोग आवश्यक: प्रधानमन्त्री
संविधान निर्माणमा जस्तै कार्यान्वयनमा पनि राप्रपाको सहयोग आवश्यक छ ।शनिबारको नयाँ पत्रिकामा लेखिएको छ, हामीले संविधानमा अधिकतम स्वीकार्यता दिलाउनकै लागि संशोधन अघि बढाएका हौँ । यसलाई अघि बढाउने विषय संविधान कार्यान्वयनसँग जोडिएको छ । मधेस, पहाड र हिमालका वर्गलाई नसमेट्नु राष्ट्रवाद हुन सक्दैन । यी तीन पक्षलाई जोड्ने नीति राप्रपाले पनि पारित गरोस् । अब सरकारले संशोधन विधेयक र निर्वाचनलाई सँगसँगै अघि बढाउने सोचेको छ । प्रजातन्त्रका लागि र संविधान कार्यान्वयनका लागि निर्विकल्प बनेको निर्वाचनको घोषणा अब छिटै हुन्छ ।
अब राप्रपासँग सँगै बस्नुपर्छ: देउवा
संविधान बने पनि देश संक्रमणमा छ । अब तीनवटा निर्वाचन हुन जरुरी छ । स्थानीय, प्रदेश र केन्द्रको निर्वाचनमा सबै पार्टीको सहमति र सहभागिता जरुरी छ । मधेसको भावना सम्बोधन गर्न संशोधन अगाडि बढाएका हौँ । संशोधन हुँदा वैमनस्य हट्छ । राप्रपा पनि महाधिवेशनबाट संशोधनको पक्षमा लाग्छ भन्ने आशा लिएको छु । म पहिलोपटक प्रधानमन्त्री हुँदा पनि राप्रपासँगै सरकारमा एक ठाउँमा थियौँ । अब फेरि पनि एक ठाउँमा सँगै बस्नुपर्छ ।
राष्ट्रियताको पक्षमा उभिनुपर्छ: ओली
भिन्न विचार रहे पनि संविधान निर्माणमा राप्रपाको सकारात्मक योगदान रह्यो । महाधिवेशनबाट राप्रपा स्पष्ट रूपमा राष्ट्रियता, एकता र लोकतन्त्रको पक्षमा उभिनुपर्छ । इतिहासका गौरवलाई कदर गर्नुपर्छ । तर, पृथ्वीनारायण शाहलाई मानियो भन्दैमा ड्रगिस्ट, जँड्याहा सबैलाई मान्न सकिन्छ भन्ने छैन ।