भक्तपुर । नेपाल कम्युनिष्ट पार्टी(नेकपा)का नेता एवं पूर्वप्रधानमन्त्री माधवकुमार नेपालले समृद्ध नेपाल, सुखी नेपालीको अभियान सफल पार्न सामाजिक संस्थाहरुले पनि सहयोग गर्नुपर्ने बताएका छन् ।
आज मध्यपुर ठिमीमा रहेको ठिमी जेसिजको ५० वर्षको अवसरमा आयोजित रजत समारोहमा उनले समाज र देशको विकासका लागि सामाजिक संस्थाहरुको भूमिका पनि महत्वपूर्ण रहने बताएका हुन् । उनले जेसिजको लामो इतिहासमा नेतृत्व विकासका साथसाथै सामाजिक विकासमा ठूलो योगदान रहेको चर्चा गर्दै उनले सामाजिक संस्थाले खेल्ने सकारात्मक भूमिकाले देशलाई समृद्धिमा लैजान टेवा पुग्ने बताए ।
कार्यक्रममा उनले ल्याम्ह पुचः, मध्यपुर युथ एशोसिएशन, मध्यपुर पोष्टका पत्रकार रामकृष्ण शङ्खदेव, डा जीवनकुमार श्रेष्ठ, सहकारीविद् कैलाशभक्त प्रधानाङ्ग, संस्कृतकर्मी गणेशराम लाछी, जेसी विजय श्रेष्ठ, संस्थापक अध्यक्ष ओमप्रकाश श्रेष्ठसहित ठिमी जेसिजका वर्ष १०९३ देखि २०१७ सम्मका अध्यक्षहरुलाई दोसल्ला ओढाई सम्मानपत्र प्रदान गरी सम्मान गरे ।
त्यसैगरी ठिमी जेसिजले प्रकाशन गरेको रजत वर्ष स्मारिका र सिक्का विमोचन गरेका थिए ।
प्रदेश नं ३ का सांसद डा राजेन्द्रमान श्रेष्ठले ठिमी जेसिजले मध्यपुर ठिमी क्षेत्रको सामाजिक विकासमा पु¥याएको योगदानको चर्चा गर्दै जेसिज सामाजिक विकासको अभियन्ताको रुपमा अगाडि बढ्नुपर्नेमा जोड दिए । त्यस अवसरमा ३ नं प्रदेशका अर्का सांसद प्रतिमा श्रेष्ठले सामाजिक क्षेत्रको विकासमा जेसिजले अझै फराकिलो भएर अगाडि बढ्नुपर्ने औँल्याए ।
मध्यपुरथिमि नगरपालिकाका प्रमुख मदनसुन्दर श्रेष्ठले मध्यपुरथिमि नगरपालिका घोषणा हुनुअघिदेखि ठिमीको विकासमा सक्रिय रहँदै आएको ठिमी जेसिजसँग विकासको क्षेत्रमा नगरपालिका हातेमालो गरेर अगाडि बढ्ने बताए ।
कार्यक्रममा नेपाल जेसिज वर्ष २०१८ का राष्ट्रिय अध्यक्ष जेसीआई सिनेटर श्रीधर बस्याल, उपाध्यक्षद्वय रबिन पोखरेल, पदमविक्रम सिंह, ठिमी जेसिजका अध्यक्ष ओमकिशोर श्रेष्ठ, जेसी डिल्लीराम श्रेष्ठ, नवीन श्रेष्ठ लगायतले जेसिजले सामाजिक परिवर्तनको संवाहक बन्दै गरेको भूमिकाको चर्चा गरेका थिए ।
