रत्ननगर । नेपाल कम्युनिष्ट पार्टी (नेकपा) का अध्यक्ष पुष्पकमल दाहालले चितवनका पुराना कम्युनिष्ट नेता भुवानीप्रसाद पौडेलसँग भेटघाट गरी स्वास्थ्यलाभको कामना गरेका छन् ।
चार महिनादेखि अन्न नलीको क्यान्सर भएर स्वास्थ्योपचार गरिरहनुभएका भरतपुर नगरपालिका–१० स्थित सिर्जनाचोकमा बस्दै आएका ७० वर्षीय पौडेललाई आज भेटघाट गरी अध्यक्ष दाहालले सरकारी सहयोगका लागि आवश्यक पहल गर्ने आश्वासन दिए ।
विसं २०३४ मा नेकपाको सदस्यता लिनुभएका पौडेललाई २०३६/३७ सालतिर दाहालले नै संगठित गरेका थिए । नेपाल कम्युनिष्ट पार्टी (चौथो महाधिवेशन) का संस्थापक सदस्य पौडेल पूर्वगाविस अध्यक्ष र दिवाकर बालग्राम माडीका संस्थापक सदस्य हुन् ।
विसं २०४७ को पार्टी एकीकरणपछि उनी संयुक्त जनमोर्चाको जिल्ला सल्लाहकार हुनुभएको छोरा टुकनारायण पौडेलले जानकारी दिए । आज भेटघाटका क्रममा उनीहरुले विगतका राजनीतिक अभियानका दुःखसुख साट्नुभएको छोरा टुकनारायणले जानकारी दिए । “राजनीतिक अभियानका क्रममा गाएका गीत बुबाले सम्झाउनुभयो, अध्यक्ष दाहालले पनि साइकल चढेर माडी पुगेको अनुभव स्मरण गर्नुभयो”, टुकनारायणले भने । उनको तीन अंशमध्ये जेठो छोरा सन्देश पौडेलको अंश पार्टीलाई दिइएको थियो ।
चार महिनादेखि भारतको राजीवगान्धी अस्पताल र चितवनको क्यान्सर अस्पतालमा उपचार भएपछि केही स्वास्थ्यमा सुधार भएकाले अहिले उनी घरमा नै आराम गरिरहेका छन् ।
यसैबीच शनिबार चितवन आएका अध्यक्ष दाहाल पार्टी कार्यकर्ता तथा विभिन्न संघसंस्थाका प्रतिनिधिसँग विकास निर्माण र राष्ट्रिय राजनीतिका विषयमा छलफल तथा आन्तरिक कार्यक्रममा सहभागी छन् ।
