बेँसीशहर, लमजुङ । सदरमुकाम बेँसीशहरमा रहेको लमजुङ जिल्ला सामुदायिक अस्पतालमा ‘विशेष नवजात शिशु सघन कक्ष’ (एसएनसियू) सेवा शुरु गर्न लागिएको छ ।
जिल्ला अस्पतालको सुविधालाई थप गर्दै यो सेवा शुरु गर्न लागिएको हो । विशेषगरी महिना नपुगी जन्मेका तथा सघन उपचार आवश्यक पर्ने गम्भीर अवस्थाका नवजात शिशुलाई लक्षित गरेर उक्त सेवा शुरु गर्न थालिएको अस्पतालले जनाएको छ ।
यसअघि जोखिम अवस्थाका नवजात शिशुलाई उपचार गर्ने प्रविधि नहुँदा अन्यत्र पठाउन बाध्य भएको अस्पतालले केही दिनमै निःशुल्क सेवा दिने प्रशासकीय प्रमुख युवराज देवकोटाले बताए ।
अस्पतालमा शिशु सघन उपचार कक्ष स्थापना भएसँगै नवजात शिशुको अकालमै मृत्यु हुने दर घट्ने विश्वास लिइएको छ । सेवा सञ्चालनका लागि भौतिक पूर्वाधार निर्माण भइसकेको र केही दिनमै सेवा शुरु गरिने अस्पतालले जनाएको छ ।
नेपाल सरकारको स्वामित्वमा १५ श्ययामा रहेको जिल्ला अस्पताल २०५८ सालमा मानव विकास तथा सामुदायिक सेवाले व्यवस्थापन जिम्मा लिई सामुदायिक अस्पतालका रुपमा सञ्चालनमा आएको थियो ।
अस्पतालमा हाल ६२ श्यया रहेका छन् भने निकट भविष्यमा १०० श्यया पु¥याउने अस्पताल विकास समितिको लक्ष्य रहेको छ ।
