चुनाव हारे पनि विवेकशीलका रविन्द्र मिश्र किन यति धेरै उत्साहित भए ? यस्तो छ कारण

काठमाण्डौ । विवेकशील साझा पार्टीका नेता रविन्द्र मिश्रले आम मतदातालाई धन्यवाद दिएका छन् । काठमाण्डौ क्षेत्र नम्बर १ बाट चुनाव लडेका नेता मिश्रले कांग्रेस नेता प्रकाशमानसिंह श्रेष्ठसँग झिनो मतले पराजित भएलगत्तै आफुलाई मतदान गर्ने र सहयोग गर्ने आम मतदाता र शुभचिन्तकलाई धन्यवाद दिएका हुन् ।
शनिबार बिहान मतपरिणाम सार्वजनिक भएलगत्तै एक विज्ञप्ति जारी गर्दै नेता मिश्रले आफ्नो भन्दा ८ सय १९ मतको अन्तरले जित हासिल गरेका नेता सिंहलाई उनले टेलिफोनबाट बधाई दिएको बताएका छन् ।

नेता मिश्रले विवेकशील साझा पार्टी निर्माण प्रक्रिया सुरु भएको ४ महिनामै विना संगठन उम्मेद्वारी दिँदा समेत जनताले पत्याएको भन्दै आफुलाई निकै उत्साह जागेको बताएका छन् । नेता मिश्रले विज्ञप्तिमा भनेका छन्, विवेकशील साझा पार्टी निर्माणको प्रक्रिया सुरु भएको ४ महिनामैं विना सङ्गठन उमेदवारी दिँदा पनि म लगायत हाम्रो पार्टीलाई भरपर्दो विकल्पका रूपमा हेरिएको तथ्यलाई मैले अत्यन्तै उत्साहजनकरूपमा लिएको छु।

मिश्रले आफ्नो पार्टीले प्रत्यक्षतर्फ जित हासिल गर्न नसकेपनि समानूपातिकतर्फ कम्तिमा तीन प्रतिशत मत ल्याउने विश्वास व्यक्त गरेका छन् । नेपालको राजनीतिक इतिहासमा यति छोटो समयमै विवेकशील साझा पार्टी लोकप्रिय बन्नुलाई गौरबको विषय भएको दाबी गर्दै उनले अर्को चुनावपछि यो देशको नेतृत्व गर्न आफुहरु तयार रहेको र त्यो चूनौती आफुहरुको काँधमा आएको उनले दाबी गरेका छन् ।

यस्तो मिश्रले जारी गरेको विज्ञप्तिः

विवेकशील साझा पार्टीको तर्फबाट मैले काठमाडौं क्षेत्र नं १ मा प्रतिनिधिसभाका लागि दिएको उमेदवारीमा मलाई विश्वास गर्ने मतदाताहरू, नेपालभित्र र बाहिर रहेका सम्पूर्ण शुभेच्छुक, समर्थक, स्वयंसेवी, संचारकर्मी, सुरक्षाकर्मी तथा निर्वाचन आयोगप्रति हार्दिक आभार प्रकट गर्न चाहन्छु।